Skáldastund í Davíðshúsi - Þórarinn Eldjárn

Þórarinn á að baki langan og farsælan höfundarferil og hefur frá fyrstu tíð verið eitt ástsælasta skáld þjóðarinnar. Þórarinn hefur sent frá sér verk í flestum greinum bókmennta: ljóðabækur í hefðbundnu formi og frjálsu, smásagnasöfn, skáldsögur, söguleg verk, leikrit og barnaljóð, auk þess sem hann hefur verið afkastamikill þýðandi og samið fjölda söngtexta.

Auk fjölhæfninnar er hann þekktastur fyrir glímu sína við hefðbundið ljóðform en einnig hefur vakið athygli hvernig hann vinnur úr íslenskum menningararfi með ísmeygilegri gamansemi sem tíðum reynist egghvöss þegar vel er að gáð. Hann er einstaklega orðhagur, jafnvígur á ljóð og laust mál og höfðar jafnt til barna sem fullorðinna.