laufas1_400_01

Laufás kemur við sögu skömmu eftir að Ísland byggðist og þar hefur staðið kirkja frá fyrstu kristni. Í katólskum sið var hún helguð Pétri postula. Prestssetur hefur verið í Laufási frá fyrstu kristni og er enn. Síðasti presturinn sem bjó í gamla bænum, séra Þorvaður Þormar, flutti árið 1936 í nýtt prestssetur og þar bjuggu Laufássprestar fram til ársins 2000.
Sú kirkja sem nú stendur í Laufási var byggð 1865. Meðal merkra gripa í eigu kirkjunnar er predikunarstóll sem ber ártalið 1698. Við austurgafl kirkjunnar stendur eitt elsta reynitré landsins frá 1855.

Búsetu í Laufási má rekja allt aftur til heiðni en í elsta hluta gamla bæjarins sem nú stendur er talið að séu viðir allt frá 16. og 17. öld. Bærinn var endurbyggður af mikilli reisn í tíð séra Björns Halldórssonar sem sat staðinn árin 1853-1882. Laufásbærinn er stílhreinn burstabær, dæmigerður fyrir íslenska bæjagerð þess tíma, en þó allmiklu stærri. Algengt var að tuttugu til þrjátíu manns væru til heimilis í Laufási, því margt vinnufólk þurfti til að nytja þessa gróðursælu kostajörð en henni fylgdu mikil hlunnindi.

Laufásbærinn er í dag búinn húsmunum og áhöldum líkast því sem tíðkaðist í kringum aldamótin 1900.

Í gamla prestssetrinu sem er í eigu Minjasafnsins á Akureyri hefur verið rekin Gestastofa Laufáss frá sumrinu 2014. Þar er lögð áhersla á móttöku ferðamanna og gesta, meðal annars með fræðslu um sögu staðarins, náttúruna og nánasta umhverfi. Hægt er að fá kaffi og léttar veitingar og njóta útsýnisins eða líta í bók og blöð í bókahorninu. Þá er einnig starfrækt í Gestastofunni handverks- og minjagripaverslun þar sem gefur að líta fjölbreytt vöruúrval m.a. frá handverksfólki af svæðinu.

 

Aðgangseyrir kr. 1800.
Kr. 900 fyrir eldri borgara 
Frítt fyrir börn yngri en 18 ára og öryrkja
15% afsláttur fyrir hópa 10 eða fleiri.
Árspassi á 5 söfn kr. 2300: Minjasafnið, Nonnahús, Leikfangahúsið, Davíðshús og Laufás.

Þjónustusími og bókanir fyrir hópa: 463 3196 eða 895 3172.
Tölvupóstur: laufas@minjasafnid.is

Gamli bærinn Laufás er á Facebook

Gamli bærinn í Laufási er hluti af húsasafni Þjóðminjasafns Íslands. Minjasafnið á Akureyri hefur umsjón með gamla bænum og sér um rekstur hans.

Laufáshópurinn heyrir undir Handraðann sem er félagsskapur fólks sem vinnur að því að viðhalda þekkingu á þjóðháttum landsins hvort sem er í handverki, tónlist, sagnahefð eða náttúru.

Handraðinn er á Facebook undir heitinu Þjóðháttarfélagið Handraðinn


Myndir úr Laufási