Dagur íslenskrar tungu - Jónas Hallgrímsson

Dagur íslenskrar tungu, 16. nóvember, er helgaður Jónasi Hallgrímssyni. Af þesu tilefni kemur út bókin Jónas Hallgrímsson - Ævimynd, eftir Böðvar Guðmundsson og verður fyrirlestur um Jónas í Ketilhúsinu á Akureyri kl. 17:15 sama dag. Um helgina verður minningarstofa og fræðimannsíbúð að Hrauni í Öxnadal opnuð fyrir almenning. Opið verður frá 13-18 báða dagana.

  

 

 

Fréttatilkynning frá Menningarfélaginu Hrauni í Öxnadal ehf. 14. nóvember 2007

Dagur íslenskrar tungu föstudaginn 16. nóvember
og afmæli Jónasar Hallgrímssonar skálds.

Bókin - gjöfin 

Þann 16. nóvember kemur út bókin Jónas Hallgrímsson Ævimynd, eftir Böðvar Guðmundsson skáld frá Kirkjubóli. Þann dag mun forseti Íslands, Ólafur Ragnar Grímsson, afhenda nemendum 10 bekkjar í Þelamerkurskóla fyrstu eintökin. Menningarfélagið Hraun ehf hyggst gefa bókina öllum nemendum 10. bekkja í grunnskólum landsins.

 

Minningarstofan að Hrauni

Um hádegisbil þennan dag verður opnuð minningarstofa um Jónas Hallgrímsson á Hrauni í Öxnadal. Minningarstofan og fræðimannsíbúðin á Hrauni verða opin fyrir almenning laugardaginn 17. og sunnudaginn 18. nóvember kl. 13-18.  Sömu daga verður hægt að fá kaffiveitingar á veitingahúsinu Halastjörnunni á Hálsi.  

Í tilefni af opnun minningarstofunnar hefur Þjóðminjasafn Íslands lánað skrifborð úr eigu Jónasar Hallgrímssonar og líkan af húsi því sem Jónas bjó síðast í í Kaupmannahöfn. Kristín Jónsdóttir listakona frá Munkaþverá lánar kaffiketil úr búi Rannveigar Hallgrímsdóttur á Steinsstöðum, systur Jónasar.

Minjasafnið á Akureyri lánar skúfhólk úr eigu Rannveigar og ýmsa aðra gripi.

Náttúrufræðistofnun Íslands og Danmarks Geologiske institut lána 10 steinasýni sem Jónas safnaði á ferðum sínum um Ísland, merkti og sendi til Kaupmannahafnar.

Helgina 17-18 nóvember er því tækifæri til að sjá á Hrauni þá gripi sem Jónas sannarlega fór höndum um, eða voru fyrir á Steinsstaðaheimilinu þegar hann átti þar viðdvöl.

Jónasarfyrirlestur í Ketilhúsinu 16. nóvember kl. 17.15.

Í samstarfi við Akureyrarstofu er boðið til fyrirlestrar Helgu Kress prófessors, sem hún nefnir “Ég bið að heilsa: Landið, skáldskapurinn og konan í ljóðum Jónasar Hallgrímssonar”.

Allir eru velkomnir og aðgangur ókeypis.

Menningarfélagið Hraun í Öxnadal ehf

stjórn þess skipa:
Tryggvi Gíslason magister, Jón Sólnes lögmaður og Guðrún M. Kristinsdóttir fornleifafræðingur.