Fyrsti áfangi að 200 ára afmæli Akureyrar 2062?

Vaskir nemendur í 6. bekk Síðuskóla afhentu Haraldi Þór Egilssyni, safnstjóra Minjasafnsins á Akureyri tvö veggteppi sem þau unnu árið 2012 í tilefni 150 ára afmælis Akureyrarbæjar.

„Teppin eru unnin þannig að við hönnuðum okkar munstur í pappír sem við síðan klipptum út og útfærðum í textíl. Við notuðum síðan saumavélar til að festa niður. Veggteppin eiga að lýsa fjölbreytileika mannlífsins á Akureyri. Við erum öll einstök en þegar við komum saman myndum við eina heild. „ sagði Hulda Karen Ingvarsdóttir fulltrúi 6. bekks Síðuskóla. Í teppinu má einnig sjá afmælismerki bæjarins ásamt afmælisárinu.

Markmið er að varðveita valin verk sem skólarnir unnu að í tilefni afmælisársins og er verk krakkanna úr Síðuskóla hið fyrsta sem tekið er til varðveislu. Hver veit nema að þau mæti til að skoða eigin verk á 200 ára afmæli bæjarins 2062?