Hörður með hádegisfyrirlestur um votplötutækni í Þjóðminjasafninu

Í dag, þriðjudaginn 2. apríl, heldur Hörður Geirsson safnvörður ljósmyndadeildar Minjasafnsins á Akureyri   hádegisfyrirlestur í fyrirlestrasal Þjóðminjasafnsins í Reykjavík.  Hann fjallar um ljósmyndaaðferð sem var ríkjandi frá 1851-1880 eða hina svokölluðu votplötutækni (Wetplate eða Collodion) sem nú hefur náð miklum vinsældum víða um heim. Fyrirlesturinn hefst kl. 12 og er öllum opinn.Úrval mynda Harðar er nú sýnt á Vegg við Myndasal Þjóðminjasafnsins. Myndirnar sýna að nýjar byggingar og nútíma fólk fær gamaldags yfirbragð með þessari tækni. Til að undirstrika það eru margar myndanna sviðsettar við gömul hús

Votplötutæknin byggir á því að negatífa er tekin á gler- eða málmplötu sem þakin er kollódíonblöndu sem inniheldur joðsilfur og er síðan framkölluð með pyrogallicsýru. Ljósnæm himnan er ekki borin á plötuna fyrr en á staðnum rétt áður en myndin er tekin. Platan er því enn vot og af því dregur aðferðin nafn sitt. Plöturnar eru lengi að taka við sér og því er myndin tekin á löngum tíma og framkalla verður plötuna strax að lokinni myndatöku. Það krefst því mikils búnaðar að taka myndir með þessum hætti því auk myndavélarinnar þarf að ferðast með alla vökva sem til þarf og einnig með sjálft myrkraherbergið. Hörður hefur smíðað stærstan hluta þessa sértæka búnaðar sjálfur.