Jólaannir í Laufási

Jólastemmning fortíðarinnar verður endurlífguð sunnudaginn 10. desember frá 14 – 16 í Gamla bænum Laufási við utanverðan Eyjafjörð. Þá mun gestum og gangandi gefast kostur á því að fylgjast með undirbúningi jólanna eins og hann var í gamla sveitasamfélaginu.

Jólaundirbúningurinn hefst með því að Þór Sigurðarson og Georg Hollanders flytja gamlar íslenskar stemmur og jólalög kl 14 í Laufáskirkju.

Í Gamla bænum mun eldur loga á hlóðum og krauma í feitinni á meðan laufabrauðið er skorið og steikt. Hangikjötsilmur læðist um híbýlin og lokkar til sín fyrsta jólasveininn, Stekkjastaur, á leið hans til byggða. Börn á öllum aldri geta reynt sig við að gera jólaskraut eins og tíðkaðist á þessum tíma og unnið verður að kertagerð. Fjölbreytt flóra gamalla jólatrjáa verður til sýnis í Gamla bænum. Yndislegur ilmur mun breiðast um híbýlin þar sem hellt verður uppá hið rómaða kúmenkaffi og gestum boðið að smakka ásamt hangikjöti og laufabrauði. Jólamarkaðurinn verður í skálanum og lifandi jólatónlist mun óma um sveitina.

Kakó og smákökur verða af þessu tilefni til sölu í nýlegum veitingasal Gamla Prestshússins.

 

Það er Laufásshópurinn ásamt fjölda annarra velunnara Gamla bæjarins sem gerir það mögulegt að hægt er að upplifa jólaundirbúning gamla sveitasamfélagsins á þennan hátt.

 Aðgangseyrir er kr. 500- fyrir fullorðna en ókeypis er fyrir börnin.