Ástin og sorgin í Davíðshúsi fimmtudaginn 23. júli kl. 15
Dagskrá í Davíðshúsi - Fimmtudagur 23. júlí kl. 15
Sumir eiga sorgir og sumir eiga þrá
- ástin og sorgin í ljóðum Davíðs
Tilfinningaþrunginn og ljóðrænan í hinu sársaukafulla og viðkvæma í kvæðum Davíðs áttu án efa sinn þátt í vinsældum þeirra. Jafnvel hinir hörðustu hlutu að komast við og finna samhljóm í hjarta sínu. Það var ekki tilviljun að upphafsljóð Svartra fjaðra 1919 var Mamma ætlar að sofna. Margir höfðu orð á því hversu sterk áhrif það vakti.
| Mamma ætlar að sofna. Mamma er svo þreytt - Og sumir eiga sorgir, sem svefninn getur eytt.
| Sumir eiga sorgir, og sumir eiga þrá, sem aðeins í draumheimum uppfyllast má.
|
Davíð var tilfinninganæmur og stundum varð þjáningin honum óbærileg. Þannig vildi hann þó vera og segir í bréfi 1920: "járnkarl get ég ekki orðið og vil ekki verða; ég vil heldur verða sleginn en slá." Þegar hann fjallar um sorgina, sársaukann og ástina, gefur hann gjarna konunni í sér orðið. Sigurður Nordal var einn þeirra sem snemma sá hvað í skáldinu bjó og hann hreifst af þessu 1916:
Ekki skal það kvelja þig
skóhljóðið mitt;
ég skal ganga berfætt
um blessað húsið þitt.
Um ljóðræna sorgina, þjáninguna og ástina sem fylgdu Davíð alla tíð, fjöllum við í fimmtudagsstundinni 23. júlí.
Umsjón með dagskránni hefur Valgerður H. Bjarnadóttir, húsfreyja í Davíðshúsi.
Húsið er opið frá kl. 13 til 17 og tilvalið að nýta tækifærið til að skoða heimili Davíðs og drekka í sig fegurðina sem þar býr.
Næstu viðburðir:
v Fimmtudagur 30. júlí
"Hálf ertu heilagur andi, hálf ertu mold" - mótsögnin í ljóðum Davíðs
v Fimmtudagur 6. ágúst
"Við erum sungnar í sekt og bann" - Rödd konunnar í ljóðum Davíðs
Aðgangseyrir kr. 1.200.- Sjá nánar á www.minjasafnid.is
Viðburðir í Davíðshúsi 2015 eru hluti af Listasumri á Akureyri www.listasumar.is