Brot af því besta – síðasta sýningarvika

Nú fer hver að verða síðastur að sjá sumarsýningu Minjasafnins á Akureyri. Sýningin hefur gengið vel og gestir safnins hafa verið hrifnir af þeim dýrmætu gripum safnins sem prýða sýninguna. Síðasti sýningardagur er 15. september en opið er alla vikuna frá 10-17.

Áhersla sýningarinnar er á útskorna og málaða gripi úr tré. Hver og einn gripur er einstakur, og bera þeir íslensku hugviti fyrr á tímum gott vitni. Elstu gripirnir eru frá miðbiki 18. aldar, en flestir eru frá 19. öld. ´Nokkrir gripanna eru eignaðir mönnum eins og Bólu-Hjálmari, Gunnlaugi Briem og Hallgrími Jónssyni frá Naustum. Auk þess má berja  merkilega röð ljósmynda úr Drangey í Skagafirði augum. Myndirnar eru teknar í verstöð á Drangeyjarvertíð, þegar veiðar á svartfugli standa sem hæst.

Á heimasíðu Minjasafnsins má finna myndir af 10 úrvalsgripum, sem eru á sýningunni, ásamt umfjöllun um þá. Slóðin er www.akmus.is

- á meðfylgjandi mynd má sjá kistil sem sagt er að Gunnlaugur Briem sýslumaður á Grund hafi smíðað og skorið út.