Það hefði hugsanlega verið nær lagi að nefna þennan dagskrárlið "Heildina í ljóðum Davíðs", því hið mótsagnakennda í ljóðum hans er einmitt það sem gerir þau heil.
Þegar hann lýsir hinni ævintýralegu Tínu Rondóní með þessum orðum: "Hálf ertu heilagur andi, hálf ertu mold", er hann að vísa til þess að hún er heil, hún er eins og hann, mannleg, breisk hugsjónavera. Um hana segir hann líka: "Þú býrð yfir barnsins tryggð, höggormsins hrekkjum og slægð." Það er ekki bara hún sem er mótsagnakennd og því heil, það er eitt einkennið á ljóðum Davíðs. Hann skapar í þeim flóknar, mótsagnakenndar persónur og aðstæður, hvort sem hann vísar í þeim inn á við eða út.
Til skáldskapargyðjunnar, lífsförunauts hans, kallar hann:
Tryll þú hug minn töfrasýnum,
tendra eld á vegum mínum,
unz ég hlýt þá náð að nema
nið frá vötnum þínum.
Davíð hefur verið kallaður maður mótsagnanna og sjálfur segir hann í bréfi til vinar síns:
".. e.t.v. hefur náttúran gefið mér meiri ástríður en sumum öðrum .. . Ég er þó á engan hátt að afsaka mig, hvorki fyrir öfgar mínar í ljóði né lífi. ... Hvítt og svart — það eru mínir litir."
Um mótsögnina og heildina í ljóðum og lífi skáldsins, fjöllum við í fimmtudagsstundinni 30. júlí.
Umsjón með dagskránni hefur Valgerður H. Bjarnadóttir, húsfreyja í Davíðshúsi.
Húsið er opið frá kl. 13 til 17 og tilvalið að nýta tækifærið til að skoða heimili Davíðs og drekka í sig fegurðina sem þar býr.
Næstu viðburðir:
v Fimmtudagur 6. ágúst
"Við erum sungnar í sekt og bann" - Rödd konunnar í ljóðum Davíðs
v Fimmtudagur 13. ágúst
Gef mér ást til alls hins góða - trúin í ljóðum Davíðs
Aðgangseyrir kr. 1.200.- Sjá nánar á www.minjasafnid.is
Viðburðir í Davíðshúsi 2015 eru hluti af Listasumri á Akureyri www.listasumar.is
Minjasafnið á Akureyri - Nonnahús daglega kl. 13-16
Laufás, Davíðshús og Smámunasafnið opið fyrir hópa
Opið fyrir skólahópa frá kl. 8:30.