Fréttir

Innlent og erlent handverksfólk hefur unnið hörðum höndum í vetur svo Gásakaupstaður fyllist lífi á ný. Miðaldamarkaðurinn verður enn meira spennandi heim að sækja nú en á síðasta ári. Víðsvegar um kaupstaðinn mun eyfirskt og danskt handverksfólk, íklætt miðaldaklæðnaði, vinna að leður- og vattarsaumi, ullarþæfingu, vefnaði og tálgun. Miðaldatónlist mun hljóma um kaupstaðinn, brennisteinn úr Námafjalli verður hreinsaður og hleypt verður af fallbyssu af þeirri gerð sem tíðkaðist í Evrópu á miðöldum.

Safninu berast ótal gjafir á hverju ári. Það var okkur sérstök ánægja að taka við gjöf krakkanna á Kiðagili sem afhentu okkur til varðveislu eftirlíkingar af húsi safnsins og Akureyrarkirkju.Eftirlíkingarnar eru nú til sýnis í sólstofu Minjasafnsins.

Halldór Jóhannsson, framkvæmdastjóri KEA, afhenti Guðrúnu Kristinsdóttur safnstjóra á Minjasafninu á Akureyri fyrsta margmiðlunardisk um sögu KEA, sem nú er aðgengilegur öllum gestum MInjasafnsins. Það var við hæfi að Minjasafnið tæki við fyrsta eintakinu þar sem forsvarsmenn KEA áttu á sínum tíma frumkvæði að stofnun safnsins.

Gamla-Syðstabæjarhúsið í Hrísey verður opnað með bráðabirgðasýningu á íslenska safnadaginn 8. júlí kl. 14.

Messa í kirkjutóftinni á hinum forna verslunarstað Gásum í Eyjafirði 8. júlí kl. 11. Sr. Solveig Lára Guðmundsdóttir sóknaprestur í Möðuvallaklausturskirkju sér um athöfnina og félagar úr kirkjukórnum leiða fjöldasöng með undirleik.

Íslenski safnadagurinn verður haldinn hátíðlegur um allt land sunnudaginn 8. júlí. Minjasafnið býður upp á fjölbreytta dagskrá víða við Eyjafjörð. Messað verður í kirkjutóft,  ullarvinnslu í Laufási, gengið um slóðir Nonna og dyrum lokið upp að menningarmöguleikum í Hrísey.   

Handverkshefðin verður í heiðri höfð í Laufási laugardaginn 30. júní. Þá verður Elín Kjartansdóttir við störf í Laufási og sýnir hvernig búa má til tölur úr efniviði íslenskrar náttúru. Elín hefur störfkl. 10 og verður að fram eftir degi.Veitingar til sölu í Gamla prestshúsinu. Opið frá 9-18.

Minjasafnið á Akureyri stóð fyrir sólstöðugöngu um söguslóðir í Hrísey í gærkvöldi, 21. júní. Þorsteinn Þorsteinsson fór fyrir hópnum og sagði frá ýmsu markverðu sem fyrir augun bar.

Fífilbrekkuhátíð 2007 var haldin á Hrauni í Öxnadal laugardaginn 16. júní s.l. að viðstöddu fjölmenni. Er talið að um 300 manns hafi verið að Hrauni þennan dag.  Á hátíðinni var fólkvangurinn í landi Hrauns, Jónasarvangur, vígður og fræðimannsíbúðin í nýuppgerðu íbúðarhúsinu frá 1933 opnuð.

Sumarsýningin Brot af því besta opnaði 2. júní. Sýningin samanstendur af  fagurlega skreyttum gripum og öðrum hlutum sem eiga sér engan líkan. Safnið er opið frá 10-17 alla daga til 15. september.Líttu á myndir af 10 góðgripum.