Fréttir

Eftir því sem nær dregur jólum fjölgar skrauti á heimilum. Jólaskreytingar voru í fyrstu tengd lýsingu og heimagerðum jólatrjám, en seint á 19. öld fóru kaupmenn að bjóða innflutt jólaskraut og efni til föndurgerðar á svokölluðum jólabösurum. Á stríðsárunum jókst framboðið enn meira   Þessar fallegu rauðu gips bjöllur voru seldar af kvenfélaginu Hlíf til styrktar góðgerðarmálum á stríðsárunum ýmist málaðar eða ómálaðar og prýddu heimili víða á Akureyri fyrir jólin og gera sjálfsagt enn. Christmas decorations were confined to candles and simple homemade christmas trees untill late in the 19th century when stores started to import such commodities. These beautiful red bells made of plaster were sold for charity by a local women‘s association in the 1940s. The bells were both sold with or without coating and decorated many houses for decades and probably still do.

Fimmtudaginn 3. desember kl. 20 fjallar Valgerður H. Bjarnadóttir um veturinn í ljóðum Davíðs Stefánssonar frá Fagraskógi í samtali við gesti, sem ber yfirskriftina "Í vetrarins skammdegishöll." Í ljóðum Davíðs Stefánssonar hefur veturinn sterka táknræna merkingu. Hann er hið ógnandi, deyðandi myrkur og kuldi og hins vegar er hann verndandi fyrir bæði náttúru og manneskju. Á veturnar sjáum við líka stjörnurnar skína og spor hinnar elskuðu í snjónum.Eftir dagskránna gefst gestum kostur á að skoða safnið. Skemmtileg kvöldstund á heimili skáldsins við Bjarkarstíg 6 frá 20-22. Takmarkaður sætafjöldi. Aðgangseyrir kr. 1.200 - munið árskortin 

  Í dag er dagur íslenskrar tungu 16. nóvember. Sá dagur er einnig fæðingadagur Jóns Sveinssonar, Nonna. Faðir hans Sveinn Þórarinsson lýsir deginum á Möðruvöllum svona í dagbók sinni: „Logn hlýindi og blíðviðri. Kl. hálf eitt í nótt vakti kona mín mig, þá orðin joðsjúk.“  Jón gamli húsmaður var í skyndi sendur af stað til að ná í yfirsetukonuna Ástu Daníelsdóttur að Hvammi. „Tók Ásta til starfa strax og fæddi kona mín eptir harða hríð sveinbarn kl. 4, og gekk fæðingin þannig að kalla má fljótt og vel, og sýnist ekki ætla að hafa nein bág eptirköst. Ég og hyski mitt allt vakti um nóttina og líka í dag. ... Frúin, Petrea, Þorgerður og annað kvenfólk hér kom smámsaman inn að „skoða barnið“ sem er vanalegt en mér öldungis óskiljanleg fýsn margs kvenfólks.“

  Árleg jólasýning safnsins fjallar að þessu sinni um hvernig talið var niður til jóla. Verið velkomin - munið árskortið

Laugardaginn 7. nóvember  kl. 14:00 opnar ljósmynda- og sögusýningin „Í heimsókn hjá Helgu” á eftir myndlistarkonuna Dagbjörtu Brynju Harðardóttur Tveiten. Sýningin fjallar um líf og tilveru Helgu Jónsdóttur 94 ára frá Syðstabæ í Hrísey, alþýðukonu sem hefur lifað tímana tvenna. Sýningin gefur innsýn í líf einstakrar konu sem hefur farið í gegnum lífið af æðruleysi og lífsgleði.Aðgangur ókeypis á opnunina.

Veturkonungur og öll hans hirð verða boðin velkomin til Akureyrar n.k. laugardag. Boðið verður upp á fjölskylduvænar leiðsagnir um allar sýningar safnsins, vetrarratleik um söfnin og laugardagsnammi eins og það gerðist gott í gamla daga.                                       Farið verður í léttar og skemmtilegar leiðsagnir um sýningarnar Ertu tilbúin, frú forseti? kl. 13; um ævintýraheim kortanna kl. 14 og Akureyri bæinn við Pollinn með augum Vilhelmínu Lever, sem fyrst kvenna kaus í opinberum kosningum. Steinunn Arnbjörg Stefánsdóttir töfrar fram seiðmagnaða vetrartóna með sellói og söng kl. 15. Enginn fer úr safninu án þess að setja upp orðu að eigin vali og gerð enda föndurstöð til staðar. Já og leikhús landkönnuðarins. Sjón er sögu ríkari! Í Nonnahúsi er sýning um Sigríði móður Nonna. Einnig verður hægt að senda ömmu póstkort og ekki væri verra að segja hvað hefur gerst frá því á sumardaginn fyrsta þegar fjölmargir sendu ömmu sumarkveðju. Aðgangur ókeypis Gleðilegan vetur. Hlökkum til að sjá ykkur, Starfsfólk Minjasafnsins á Akureyri