Fréttir

Héraðssýningin  Hér á ég heima verður opnuð föstudagkvöldið 6. desember kl 20 í Kaffi Laufási, gamla prestshúsinu, í Grýtubakkahreppi. Sýningin er hluti af afmælissýningaröð Minjasafnsins á Akureyri sem varð 50 ára á síðasta ári.  Hún samanstendur af myndum og munum frá Grýtubakkahreppi.  Á opnuninni munu sagna- og kvæðafólk úr héraði leika á alls oddi og handverksfólk verður með jólamarkað.  Þetta er tilvalið tækifæri fyrir heimamenn og áhugasama til að koma saman og  rifja upp gamlar og góðar minningar. Maður er manns gaman. Sýningin er opin kl 13-17  laugardaginn 7. desember og  sunnudaginn 8. desember sem er  jólastarfsdagur i Gamla bænum. Það verður því mikið um að vera þessa helgi í Laufási.

Ný jólahefð – vertu með frá upphafi! Minjasafnið á Akureyri opnar jólasýningu laugardaginn 30. nóvember kl 13. Í aðalhlutverki eru 82 hrekkjóttir íslenskir jólasveinar, skógur gamalla jólatrjáa, jólaskraut, spennandi jólasveinaveröld og rannsóknarstofa jólasveina. Allir þekkja jólasveinana 13 en hverjir eru hinir 69?  Í ár og næstu ár verða þeir myndgerðir. Flotsokka og Faldafeykir birtast nú í gerð Ingibjargar H. Ágústsdóttur, listakonu.   Gægðust inní smáveröld jólasveinanna sem Þórarinn Blöndal listamaður og leikmyndahönnuður hefur skapað. Settu þig  í spor þeirra og prófaðu hluti sem tengist þeim!  Hver þeirra var mesta vöðvabúntið og hrekkjóttastur? Voru það Þvengleysir og Stigaflækir eða einfaldlega Gluggagægir?  Bæjarbúar hafa plantað skógi jólatrjáa í sýninguna sem eru frá árunum 1920 til okkar tíma. Ekkert jólatré í dag er án jólaskrauts og leikur það stórt hlutverk í jólahaldinu. Forvitnilegt er að sjá hvaða skraut rataði á trén og gerði heimilið jólalegt.   Jólasýning Minjasafnsins á Akureyri verður sett upp árlega um ókomna framtíð með það fyrir augum að heimsókn í safnið verði framvegis fastur liður í undirbúningi jólanna. Jólasýningin er ein af afmælisgjöfum ríkisins til Akureyrarbæjar. Gjöfin var snjókorn sem nú er orðið að snjóbolta og verður án efa í framtíðinni aðlaðandi snjókarl fyrir börn á öllum aldri. Sýningin verður aldrei eins frá ári til árs en alltaf kunnugleg!  Minjasafnið er opið daglega frá 30. nóvember – 6. janúar kl 13-17. Lokað er á hátíðisdögunum.  

Jólatréskógur er farinn að vaxa í sýningarsal Minjasafnsins þökk sé vel vakandi íbúum fjarðarins sem svöruðu kalli okkar í leit að gömlum jólatrjám. Hér er tré sem brátt fær sinn stað í skóginum. Jólasýningin opnar laugardaginn 30. nóvember. Sjáumst þá!

Í tilefni afmælisdags Nonna ákvað Hlíðarskóli að lána Nonnahúsi nemendaverk til sýnis. Nemendur þar hafa verið að kynnast Nonna. Gert líkan af Nonnahúsi og líkan af Nonnastyttunni. Þessi verk þeirra má sjá í notalegri stund í Nonnahúsi á morgun, laugardaginn 16. nóvember kl 14-16.

Í dag 11. nóvember er fæðingardagur sr. Matthíasar Jochumssonar eins afkastamesta ljóðskálds Íslendinga. Hann samdi þjóðsöng Íslendinga, Lofsönginn, samdi ótal ljóð og leikrit en það þekktasta er leikverkið um Skugga-Svein. Hann þýddi auk þess ótal leikverk en mörg hver voru eftir Shakespeare. Matthías var vel liðinn prestur og ástsæll meðal Akureyringa og þjóðinni allri. Þetta sagði Davíð Stefánsson frá Fagraskógi um afmælisbarn dagsins:Hugur hans og list eru fráhverf þeim óskapnaði, sem vaxinn er úr vantrú og stórmennskubrjálæði, gljáir um stund, en springur snögglega líkt og sápukúla, hol og kjarnalaus. (Davíð Stefánsson, 1960/ Skáldið í Sigurhæðum, 1963)

Hátt í 70 gestir komu á safnið um helgina til að sjá þjóðbúninga og þjóðbúningahluta, hlusta á erindi og fá greiningu á ýmsu tengdu þjóðbúningi. Námskeiðið í undirpilsagerð gekk vel með styrkri handleiðslu Oddnýjar Kristjánsdóttur, klæðskera og kennara hjá Heimilisiðnaðarfélagi Íslands. Við þökkum Heimilisiðnaðarfélagi Íslands kærlega fyrir samstarfið og gestum safnins fyrir góða heimsókn.

Þjóðbúningadagar verða haldnir í Minjasafninu á Akureyri helgina 9. til 10. nóvember milli kl. 13 og 17. Þeir eru haldnir í samstarfi við Heimilisiðnaðarfélag Íslands, sem fagnar 100 ára afmæli í ár og Handraðans, sem er félagsskapur fólks í Eyjafirði sem vinnur að því að viðhalda þekkingu á íslenskum þjóðháttum. Þjóðbúningadagar hefjast á námskeiði í gerð undirpilsa fyrir þjóðbúninga, sem Oddný Kristjánsdóttir, klæðskerameistari og kennari hjá Heimilisiðnarfélagi Íslands stýrir, en fjöldi kvenna vinnur nú í því “að koma sér upp búning” eins og það hefur verið kallað í gegnum tíðina. Laugardaginn 9. nóvember kl. 13 opnar sýning á þjóðbúningum og munum þeim tengdum í eigu Minjasafnsins auk búninga í eigu Heimilisiðnaðarfélagsins og faldbúningum í vinnslu frá konum í Handraðanum. Þá verður örsýning frá Júlíu Þrastardóttur gullsmið um meðhöndlun á víravirkisskarti.  Solveig Theodórsdóttir, formaður Heimilisiðnaðarfélags Íslands flytur erindi í tengslum við 100 ára afmæli félagsins kl. 14 og Oddný Kristjánsdóttir heldur fyrirlestur um mismunandi gerðir íslenskra þjóðbúninga frá árinu 1750 til okkar daga kl. 15. Sunnudaginn 10. nóvember milli kl. 13 og 14 gefst almenningi kostur á að koma í Minjasafnið með þjóðbúninga og eða búningahluta og mun Oddný Kristjánsdóttir bjóða upp á greiningu á þeim. Í Safnbúð Minjasafnsins verða valdir munir og bækur tengdir þjóðbúningum íslenskra kvenna. Aðgangsmiði í safnið mun gilda alla helgina og tekið skal fram að þeir sem mæta í þjóðbúningum fá frítt inn.